 |
| Woh mar kar maut ko jeet gayi... Hum jee kar bhi zindagi ko haar gaye..!! |
" In memory of Delhi gang rape victim - Damini "
Ek cheekh usne lagayi toh hogi
Marte-marte zaroor muskurayi bhi hogi
Yaad aaya hoga bhai ko rakhi baandhana
Jaate-jaate Maa Baap ki yaad satayi bhi hogi
Bhagwaan se zinda rehne ki aas lagayi toh hogi...
... Ek cheekh usne lagayi toh hogi
Aakhiri baar tatole honge bikhre hue sapne
Num aankhon se yaad kiye honge sab apne
"Kaash uss bus mein na chadti" bhi socha hoga
Kaash uss din hote saang uske sab apne
Ek aakhiri baar un darindon ki darindagi yaad aayi toh hogi...
... Ek cheekh usne lagayi toh hogi
Che mardon mein apne jism ko bat'te dekha hoga usne
Udaan bharne wale apne parro ko kat'te dekha hoga usne
Bahut kuch dekha hoga uss raat jo kabhi socha bhi na hoga
Khud ke aage khud ko marte dekha hoga usne
"Eh Bhagwaan bachale mujhe" - Yeh fariyaad zubaan par aayi toh hogi...
... Ek cheekh usne lagayi toh hogi
Woh bachpan mein ped par charh kachche amrudo ko thordna
Mohalle mein cricket khelte hue padosi ka kaanch phodna
Woh gaon mein bhains ke seeng pakad steering ki tarah modhna
"Maa, yeh mithai sab bhai ne khayi hai" - Aisa nadaan jhooth bolna
Bachpan ki meethi yaadein ek aakhiri baar bulayi toh hongi...
... Ek cheekh usne lagayi toh hogi
Naye kharidey hue kapade dharey ke dharey reh gaye
Beti ki shaadi ke jode paise pade ke pade reh gaye
Ab kaun mangega pita se haq se pocket money
Woh mar kar amar ho gayi, hum jee kar bhi mare ke mare reh gaye
Mummy Papa ne apni Rani bitiya ko aakhiri baar pariyon ki kahani sunayi toh hogi...
... Ek cheekh usne lagayi toh hogi
Ek sawaal usne insaan ke bhagwaan se kiya hoga
Ek sawaal uss bhagwaan ke insaan se bhi kiya hoga
Kiye honge khud se kitne he sawaal kitni baar uss ne
Ek jawaab khud ko khud he diya bhi hoga
“Kya ho gaya zindagi mein” yeh vichaar kar ghabrayi toh hogi...
... Ek cheekh usne lagayi toh hogi
Woh mar kar bhi har hindustani mein zinda hai
Bahut unchi udaan hai uss ki, woh ek bekhauf parinda hai
Tarunnam mein jeene wali andheri vaadiyon mein kahi kho gayi
Apni zindagi ki toh na ho saki par purre bharat ki woh ho gayi
Damini, tumhari kurbani par he naye Bharat ka nirmaan hoga
Yeh tumhara har bharatwasi par ehsaan hoga
Yun toh kuch nahi kar sakta mein tumhare liye
Par meri yeh kavita tumhare honsle, sahas, aur jajbe ko salaam hoga
BALATKARIYO NE BHI SHARAM SE AANKHEN JHUKAYI TOH HONGI...... EK CHEEKH USNE LAGAYI TOH HOGI !
... Ek Cheek Bharat Ki Beti Ne Lagayi Toh Hogi..!!
- Jorawar Walia
Image source: Internet
